حتوته حجازيه .......(( لاتفوتكم))

lovely girl الثلاثاء نوفمبر 25, 2008 11:41 am

بسم الله الرحمن الرحيم
والصلاة والسلام على نبينا محمد .

بما اني حجازيه راح احكيلكم حتوته قصيره طويله وبصراحه حلوه وهي قصة: >>>> نصيحه اقروها قبل ماتنامون

""" بـــنـــــت الــــفــــوال """

وحدوا الله ... لا إله إلا الله ..

واللي عليه ذنب وخطية يقول ... أستغفر الله ...

كان ياما كان في قديم الزمان كان في واحد مللك إسمه عباس يتخفى وينزل البلد

والاسواق يبيع ويشتري ويشوف حال أهل المدينة ويتفقد أحوالهم .

وكان في واحد فوال إسمه عم صدقة كبر في السن وصار نظره على قده وخاف لا ينحرق

أو يطيح وهو بيبيع في الدكان . قال لبنته هاجر تساعده في البيع والشرا . واقفت بنته

وكانت غاية في الذكاء والدهاء والجمال وكانت معتزة في أبوها وصنعته , وكانت تنشد

بصوت عذب وتغني على فول أبوها وتقول :

( فول أبويا طاب واستطاب وأكلوا منه جميع الاحباب )

مر الملك عباس وهو متخفي وسمع صوت هاجر وهي تنشد على فول أبوها . وقف

وقال لها : فول الملك احسن وأطيب قالت : ومين قال لك ؟ ما يجي شي مع فول أبويا ,

ذوق وأحكم . قال لها : يابنت الفوال فول الملك احسن . قالت : لايغرك هذا أطعم .

اشترى الملك منها فول ولأول مسكين أعطاه . وراح على بيته يفكر كيف يذلها ويكسر خشمها

فكر الملك عباس وفكر في امر بنت الفوال إللي تفضل فول ابوها على اكل الملك

وبكل هذي الجراءة , حتى اهتدى كيف يشوفها مكسورة النفس . أرسل الحراس لأبوها

يستدعوه . وقال الفوال : ليه وعلشان إيه ؟ أنا لا أعرف الملك ولا هو يعرفني وبدا يبكي ويتنافض

قالت هاجر للحراس : الملك طلبه ليه ؟ قالوا : ما نعرف ليه يقوم معنا وبس ...

راح الفوال عم صدقة مع الحراس ودخل عند الملك وسلم عليه .قال الملك عباس :

أبغاك تقول لي عدد اوراق الشجر في حديقتي بالعد والتفصيل . قال الفوال : كيف يا مولاي

ومين يقدر يعد اوراق شجرة وحدة مو اشجار كثير ! قال الملك : ثلاث أيام لوجيتني وما معاك الحل راسك حينقطع .

خرج الفوال صدقة وشايل هم الدنيا معاه وراح على بيته زعلان . رجعت هاجر من

الدكان شافته نايم وما قام . قالت له : خير يا أبويا إيه يبغى بك الملك ؟ قال : خلاص ما

ينفع الكلام بعد ثلاث أيام حينقطع راسي والسلام . قالت : ليه وإيش سويت ؟ قال لها :

ما سويت شي . طلب مني أقول له كم عدد أوراق شجر حديقته . انذهلت هاجر من السؤال

وقالت : ليه يسألك هذا السؤال وإنت بالذات أكيد في نفسه حاجة عليك .

أقول لك ولا يهمك , كل وأشرب يا بويا ويحلها الحلال .

خلصت الثلاث الأيام والأب كان خايف لكن هاجر قالت له إذا جوك الحراس روح

معاهم وفهمته إيه يقول إذا سأله الملك عباس .

بعد ساعة زمن من الموعد جوا الحراس وأخذوا الفوال عم صدقة معاهم ,

ولما وقف قدام الملك قال : ها .. جبت حل الفزيرة ولا نقطع راسك وتلاقيه عند مداسك ؟

قال الفوال : انت سألتني إيه يا مولاي ؟ قال : انت نسيت السؤال يا فوال ؟ قال : لا يا

مولاي بس عيد علي السؤال . قال : قلت لك كم ورقة في اشجار الحديقة والبستان .

قال الفوال : بسيطة عددها قد عدد كواكب السماء .

بهر الملك عباس من الإجابة وقال : من علمك حلها ؟ قال : بنتي هاجر . قال الملك : الله معاك روح في حالك .

وفي اليوم التالي راح الملك وهو متنكر على دكان الفوال عم صدقة يبغى

يختبر بنته هاجر وسألها : ها .. يا بنت الفوال كيف فول أبوك ؟ قالت :

( طاب واستطاب وأكلوا منه جميع الاحباب )

قال الملك عباس : كل الفوالين فولهم طعم وطيب . قالت هاجر : بس موزي فول أبويا .

قالها ولا فول الملك عباس .. قالت له : ولا فول الملك كمان .

راح الملك على قصره غضبان وارسل الحراس يحضروا أبوها وهو يفكر في حزيرة

مايسلم منها راسه . وبعد ما حضر الفوال قدام الملك قال له : ابغاك تجيب لي يفوال

موية ما هي موية وعيش ماهو عيش . قال الفوال المسكين : كيف يا مولاي ؟ قال الملك :

قدامك ثلاث أيام ولا راسك حينقطع وتلاقيه عند مداسك .

راح الفوال صدقة باكي شاكي على بيته وحط راسه يبغى ينام . لكن فين ينام وعلى قوال المثل :

( قال : نام ابغى اقتلك . قال له : كيف يجيني النوم ؟ )

رجعت هاجر على البيت وشافت حالة ابوها اللي ما تسر عدوا ولا حبيب , ولما عرفت

السبب فكرت وقالت : ولا يهمك كل ونام ويحلها الحلال ولا تشيل هم . وفي اليوم التالي

جابت نواة التمر وطحنته وعجنته وخلته زي قرص العيش وخبزته وصار عيش ماهو عيش

وعصرت قصب سكر في كاسة واعطته أبوها .

جوا حراس الملك وأخذوا أبوها , وقف الفوال قدام الملك عباس ومعاه حل الألغاز .

مسك الملك الكاسة وشاف فيها موية بس ماهي موية وعرف إنها من قصب السكر ,

وقرص العيش ماهو عيش وعرف إنه من نواة التمر , وعرف السر إن بنته ذكية وداهية

وهي اللي بتحل له الالغاز .

في اليوم التالي راح الملك لبنت الفوال صدقة وهو لابس ومتخفي وقال : ها .. يابنت الفوال

كيف حال فول أبوك . شكت هاجر في شخصية هذا المشتري والهيبة اللي عليه ,

وشكله شكل ماهو شخص عادي , اكيد هو الملك عباس اللي كل ما جا يشتري من عندها

بعدها يجوا حراس الملك ويأخذوا أبوها ويجي محتار من الأسئلة اللي بيسأله هي .

قالت : في نفسها والله أكيد هذا الملك وبينغاظ من كلامي لا أغيظه زيادة ولو طلب زيادة

أزيده ابتسمت وقالت :

فول أبويا طاب واستطاب وأكلوا منه جميع الأحباب

واحسن من فول الملك عباس ولو سألت عنه الاصحاب

اشترى الملك عباس الفول منها وفي أول شارع رماه , وراح على قصره غضبان .

وفكر في مصيبة أكبر هذه المرة أكيد ما تعرف لها حل ويقطع راس أبوها .

أرسل الحراس وقال : هاتوا عندي الفوال .

أستجار الفوال صدقة من هذا الملك الظالم ووقف بين يده ينتظر سؤاله وقال : نعم يا مولاي

قال : بعد ثلاث أيام تجي القصر لابس عريان تضحك وتبكي راكب وماشي

قال : كيف كذا يا مولاي ؟ قال الملك : تجي زي ما طلبت منك بعد ثلاثة أيام , ولا راسك عند الاقدام .

راح الفوال على بيته وقال هذه المرة ما فيها خراج الملك الظالم أعطاني كلام ما له حل

وأكيد بعد ثلاث أيام أنا ميت ميت , وبعد ما رفت هاجر طلب الملك منه فكرت

شوية وضحكت وقالت : بسيطة ولا يهمك يا أبويا كل وأشرب ونام , ويحلها الحلال

بعد ثلاث ايام وفي الموعد المحدد دقوا الحراس الباب وطلبوا الفوال , قيدها عبت هاجر

لاوازم الحزيرة لأبوها .

خرج الفوال على الحراس راكب جحش صغير ورجله في الأرض وصار راكب ما شي ,

ولابس ملابس شاش كل جسمه باين تحتها , وصار لا بس عريان , ولما وصل عند الملك

خرج راس بصل حار صار يقضم منه والدموع تجري على خده وهو يضحك ويصهلل

وصار يبكي ويضحك .

ذهل الملك عباس من ذكاء بنت الفوال صدقة وفي الحال طلب يدها من أبوها .

قال الفوال : أنا ما عتدي مانع آخذ رايها في الحال . وراح على بنته وقال لها :

الملك عباس طالبك للزواج ياليت تآخذيه يا بنتي وتفكيني منه . وقالت :أنا موافقه

عليه خليها الخميس الجاي . وهي عارفة إن الملك ناوي لها علي نية بعد ما عجزته بذكائها .

راحت هاجر للحلواني وقالت له : شايف طولي شايف عرضي شايف ملامح وجهي .

قال لها الحلواني : كل شي شايفه فيك طلباتك ؟ قالت : تسوي عروسة من الحلاوة على

شكلي بس خلي رقبتها متحركة وحط فيها سلسلة وبعد يومين أخذها منك واعطيك

إللي تطلبه . قال الحلواني : خلاص ابشري , بعد يومين تلاقي طلبك منتهي .

في يوم الزواج لبست نبيلة ملابس العرس واتزينت وصارت أجمل بنت

شافتها العين . طلبت من أبوها يا خذ العروسة الحلاوة ويدسها في غرفتها ويخفيها عن الانظار .

وبعد النصة والزفة أستأذنت هاجر الملك عباس لحظات تدخل تغير ملابسها في الغرفة

أذن لها على عجل .

دخلت هاجر تجري وشالت الشرشف عن العروسة الحلاوة وجلستها على الكرسي

واندست ( أ ختبأت ) تحتها . دخل الملك عباس وهو لابس سيفه ووقف قدام العروسة الحلاوة

وقال لها : يا بنت الفوال فول أبوك طاب واستطا ب وأكلوا منه جميع الاحباب ...

هزت هاجر السلسلة اللي في رقبة العروسة من تحت الكرسي .. نعم

قال لها : فول أبوك احسن فول في الدنيا واحسن من فول الملك كمان ؟

هزت السلسة في رقبة العروسة يعني نعم .

قال : وكمان تعانديني يا بنت الفوال وشال السيف وضرب رقبتها .

طارت وصله حلاوة في فم الملك زعــــل واتــنـــكدا واتــــنــــدم وقـــــــــــــــــــال :

(( أولك مـــرة وآخرك حلــــوة لو ماكنت قوية وعنيدة كان اليوم كنت زوجة وحبيبة ))

خرجت هاجر من تحت الكرسي ومسكت يد الملك عباس وقالت :

الأمــــــان يا ملك الزمـــــــان

قال الملك عباس : إنت حية وعايشة ؟؟

قالت بسخرية : لا أنا عقربة وصالحة .

ضحك الملك عباس من قــــلـــبـــه , وفرح بيها وبذكائها

وبعبقريتها , وعاشت معاه في سعادة وهناء و خلفوا صبيان وبنات ....

وتــــوتـــــــــة تــوتــــة فـرغــت الــحــتوتــــــــة

لو كان بــيــتـــي قــريــب كــان جــبــت لــكــم شـــويـــة لــوز وزبــيـــب

ولـــو كــان طــاقـــيــــتـــي ما هي مــخـــروقـــة كان جــبـــتـــلـــكـــم شـــويــــة مــســلـــوقــــة .....

اتمنى تكون عجبتكم ودخلتكم جو ثاني

تحياتيـ, ((( lovely girl )))